تازہ ترین
صفحہ اول » اہم خبریں » بجٹ سے قبل وزیراعلیٰ پنجاب نے ملازمین کو بڑی خوشخبری سنا دی

بجٹ سے قبل وزیراعلیٰ پنجاب نے ملازمین کو بڑی خوشخبری سنا دی

Punjab Chief Minister Gave a Big News to Employees Before The Budget

وزیراعلیٰ پنجاب محمد شہبازشریف نے ایم این سی ایچ پروگرام میں کنٹریکٹ پر کام کرنے والے 234 ملازمین کو ان کی ملازمت پر ریگولر کر دیا اور سیکرٹری محکمہ پرائمری اینڈ سیکنڈری ہیلتھ علی جان خان نے اس سلسلہ میں باقاعدہ نوٹیفکیشن بھی جاری کر دیا ہے۔ صوبہ میں ضلع کی سطح پر میٹرنل، نیوبارن اینڈ چائیلڈ ہیلتھ (MNCH)پنجاب کے ڈسٹرکٹ مینجمنٹ یونٹ کے ملازمین کا دیرینہ مطالبہ تھا کہ انہیں ریگولر کیا جائے جس پرصوبائی وزیر صحت خواجہ سلمان رفیق اور خواجہ عمران نذیر نے اس مسئلہ کو حل کرنے کے لئے ذاتی دلچسپی لے وزیراعلیٰ محمد شہبازشریف کو سفارش کی، وزیراعلیٰ پنجاب نے 234 خاندانوں کا معاشی مسئلہ حل کرتے ہوئے سمری کی منظوری دی۔

محکمہ پرائمری اینڈ سیکنڈری ہیلتھ کی جانب سے گزشتہ روز جاری ہونے والے نوٹیفکیشن کے مطابق ریگولر ہونے والوں میں گریڈ ایک سے 17 تک کے ملازمین شامل ہیں۔ صوبائی وزیر سپیشلائزڈ ہیلتھ کیئر اینڈ میڈیکل ایجوکیشن خواجہ سلمان رفیق اور وزیر پرائمری ہیلتھ خواجہ عمران نذیر نے ریگولر ہونے والے ملازمین کو مبارکباد دیتے ہوئے امید ظاہر کی ہے کہ وہ زیادہ لگن اور محنت کے ساتھ اپنے فرائض انجام دیتے ہوئے ماں بچہ کی صحت کے پروگرام کو کامیاب بنائیں گے۔ ایم این سی ایچ پروگرام کے ملازمین کے نمائندے میاں افضل کمیانہ نے ملازمین کو ریگولر کرنے پر وزیراعلیٰ پنجاب ، صوبائی وزراء صحت اور سیکرٹری صاحبان کا شکریہ ادا کرتے ہوئے کہا کہ MNCH کے ملازمین کے گھروں میں خوشی کی لہر دوڑ گئی ہے۔ میاں افضل کمیانہ نے کہا کہ وزیراعلیٰ محمد شہبازشریف نے 234 ملازمین کو ریگولر کر کے ان کے سروں پر لٹکتی بے یقینی کی تلوار کو ہٹا کر 234 خاندانوں کے ہزاروں افراد کے دل جیت لئے ہیں۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون/ خبر پسند آیا ہے تو اسے اپنی فیس بک وال پر شیئر کریں۔